Zgjohu, erdhi koha!

Agjërim. Detyrim! Nuk po merr vesh barku e epshi. Tkurrje! Nuk po afatizon dot lakminë e pasionet.  Erdhi koha, koha e sundimit dhe mbizotërimit. Kur shpirti lufton kundër trupit, ndërgjegjja kundër epshit, besimi kundër mosbesimit, kur e mira forcohet me përforcues, ndërsa e keqja dobësohet e dorëzohet.

Zgjohu, erdhi koha, kur lutja pranohet, kur përpjekja ndihmohet, e kur djalli i mallkuar në pranga vihet! Ai është muaji, në të cilin shenjat e rrugës së paqes bëhen më të qarta se asnjëherë tjetër. Atëherë kur ti gjykon me sytë e zemrës e të mendjes së shëndoshë. Kur trupit i thuhet “Ngrysu!”, ndërsa zemrës e mendjes i thuhet “Gdhihu!”. Koha kur bojkoton nga mëngjesi gjer në mbrëmje kënaqësitë e përkohshme të kësaj jete. Atëherë kur, bojkoton edhe cytjet e të keqes dhe të këqijve.

Zgjohu, sepse erdhi koha e përpjekjes; përpjekje e mundimshme, ama do korrësh qetësi në shpirt e në zemër, virtyt e mendje të kthjellur. Në këtë muaj të bekuar ke mundësinë e zgjedhjes. Po në këtë muaj ke mundësinë t’i shohësh gjërat drejtë e pastër. Sepse, je më pak i cytur nga epshi e lakmia, që sytë e zemrës e arsyen e shëndoshë i ka turbulluar.

Koha kur u nda e kota prej të vërtetës; u sqarua e drejta, e pastra dhe e bukura. E vërteta, komunikata hyjnore, e cila të mësoi sesi të bësh jetë të ndershme, sesi të fitosh të dy jetët në paqe e mirësi të plotë. Urdhër madhështor prej Zotit të qiejve e të tokës: Leximi. Duhet të lexosh, të mësosh e të mendosh. Më tepër se asnjëherë tjetër. Të zësh hapin e kohës. Lexo argumentet që mbartë brenda vetes. Mëso për rrugën e Zotit. Mendo për madhështinë e krijimit. E pastra, pastërtia fizike, mendore e shpirtërore. E bukura, falja, durimi e mëshira.

Zgjohu, se zgjimi i sinqertë me mbrëmjen e parë të këtij muaji, të bën të zgjuar deri në ditën e Llogarisë. Është përmbushur dhuntia e Zotit ndaj qenies njerëzore. Është përsosur mësimi për edukatën. S’ke pse arsyetohesh; s’duam të vazhdojmë në gjumin e dëshpërimit. Përballja me krizat dhe pengesat është rrugëdalja e vetme.

Pa sprova e telashe nuk ka njeri në fytyrë të tokës! Mos e mendo veten të vetëm në udhëkryq të hutuar. Bashkë me ty ka plot të tjerë. Ky muaj duhet të na bëjë të njohim sprovat dhe telashet e njëri-tjetrit; meqenëse pesë takimet brenda 24 orëve s’u arrit, le të arrihet duke ngrënë syfyr e iftar, e duke bërë adhurim gjatë mbrëmjes, e duke vizituar xhamish e miqsh.