Zgjohu, Zoti yt gjykoi!

E ç’gjykim tjetër pret, nëse je bindur se tek Ai është kthimi i çdo gjëje?

Zoti yt gjykoi, krijoi natën. E heshtur. Errësirë. Mbulesë, ruajtje e prehje. Kundër të shtënave të zemrave të dalldisura; ruajtje nga shigjeta e syve të cytur. Hapet horizonti, hapësira duket. Drita e syve përqendrohet. Yjet vëren, me ndriçimin e të cilave, mendja lirshëm në hapësirë noton. E trokitjet e zemrës, lehtësisht nga të rrahurat duke pushuar; tronditje e ngarkesë; me lëvizje e pasion e ngulfatur. Zjarri i epshit e lakmisë me freskinë e territ duke u verbuar. E ç’gjykim tjetër pret; mos ndoshta mohues i qetësisë, prehjes shpirtërore, po bëhesh?!

Zoti yt gjykoi, lexo! Leximi të fut në funksion thuajse çdo qelizë të trupit tënd. Mendimi që fitohet me devotshmëri, të çliron e të ngritë. Dituri që ty të hap mendjen, të zgjeron zemrën e të pastron shpirtin, kur vetveten fillon të zbërthesh. Ndien të vërtetën rreth vetvetes dhe ekzistencës. Nuk ndihesh i huaj e i vetmuar por, i rrethuar me plot krijesa tjera të një Krijuesi të Vetëm. Me lexim, i bën padrejtësi kotësisë, mposhtë të pavërtetën, dëmton epshin, ndërsa vetes i vesh petkun e nderit: njeri. E ç’gjykim tjetër pret; mos ndoshta mohues i nderit që t’u bë, po bëhesh?!

Zoti yt gjykoi, dhunën ndaloi! Harmoni e mirësi. Afri e dashuri. Falje e lehtësim. Forcë as ndaj gjësë që s’mendon, s’u ushtrua. Dhuna mbyllë në qeli vullnetin e mendimin, zemrat i bën të thara, pa lëngë të tolerancës, i bënë të ndrydhen e të ngushtohen. Jo dhunë. Jo forcë. Dhuna shkakton dhunë, armiqësi kundër miqësisë; forca shkaktues i frikës. Nuk mund të vihet drejtësia e as të arrihet bindja, po patë armiqësi e frikë. Hapni zemrat, le të shijojnë gjerësinë. Jini të mëshirshëm, shijojeni mrekullinë e afërsisë. Duroni e falni, shijojeni madhështinë e epërsisë! E ç’gjykim tjetër pret; mos ndoshta mohues i gjerësisë dhe epërsisë që t’u mundësua, po bëhesh?!

Zoti yt gjykoi, parim butësinë dhe urtësinë! Zemrat të gjejnë të vërtetën në paqe. Të nxitet arsyeja nëpërmjet fjalës së butë e të urtë, me shkëndija të logjikës së shëndoshë. Bindja e plotbindur, kur vullneti i lirë ushtrohet me mendje të edukuar.